रत्ननगर । रत्ननगरका एकल महिलालाई कानुनी सचेतना र साइबर अपराधसम्बन्धी एकदिने अभिमुखीकरण कार्यक्रम गरिएको छ ।
नगरस्तरीय एकल महिला समन्वय समितिको आयोजना र नगरपालिकाको आर्थिक सहयोगमा सोमबार एकल महिलाहरुका लागि कानुनी सचेतना, सकारात्मक सोच र साइबर अपराधसम्बन्धी एकदिने अभिमुखीकरण कार्यक्रम गरिएको हो ।
कार्यक्रममा नगरस्तरिय एकल महिला समन्वय समिति सचिव तथा योग प्रशिक्षक गीता अधिकारीले सकारात्मक सोच, इलाका प्रहरी कार्यालय टाँडीका प्रमुख प्रहरी नायक निरीक्षक गोविन्द परियारले साइबर अपराध र नेपाल बार एसोसिएसन चितवन अध्यक्ष तथा वरिष्ठ महिला अधिकारकर्मी अधिवक्ता फूलमाया रानाभाटले कानुनी सचेतनासम्बन्धी प्रशिक्षण दिएका थिए ।
महिला समन्वय समितिकी संयोजक गीता देवकोटाको अध्यक्षतामा भएको कार्यक्रममा सामाजिक विकास समिति संयोजक तथा वडा नं ५ का वडाध्यक्ष बालकृष्ण चापागाईं, महिला विकास अधिकृत दीपा घिमिरे, नगरस्तरीय लक्षित महिला व्यवस्थापन समिति सदस्य नीता ढकाल, मेलमिलाप रत्ननगरकी कोषाध्यक्ष अनिता अर्याल, कार्यपालिका सदस्य चन्द्रकला पनेरु, जनप्रतिनिधि रमा भट्टराई, शारदा न्यौपानेलगायतको आतिथ्यता रहेको थियो ।
कार्यक्रम नगरस्तरीय एकल महिला समन्वय समितिका कोषाध्यक्ष एलिना पराजुलीले सञ्चालन गरेकी थिइन् ।
