रत्ननगर । रत्ननगर नगरपालिकाका नगरप्रमुख प्रलाद सापकोटाले आर्थिक वर्ष २०८०/८१ को नीति तथा कार्यक्रम सार्वजनिक गरेका छन् । आइतबार नगरकार्यपालिकाको सभाहलमा आयोजित १३औँ नगरसभामा नगरप्रमुख सापकोटाले १६ वटा नीति तथा कार्यक्रम सार्वजनिक गरेका हुन् ।

नगरप्रमुख सापकोटाले नगरक्षेत्रका मुख्य सडक र चोकहरुमा सडक बत्तीमार्फत उज्यालो रत्ननगर अभियान सञ्चालन गरिने, स्थानीय समावेशी सरसफाइ कार्यक्रमलाई प्राथमिकता दिँदै दिसाजन्य लेदो र ढल व्यवस्थापनसहित नगरगौरवको योजना कार्यान्वयन, सडक सञ्जालको विकास गरी रिङरोडको अवधारणालाई कार्यान्वयन, पर्यटन प्रवर्द्धन गर्दै नयाँ पर्यटकीय गन्तव्य पहिचान गर्ने, पञ्चकन्या सामुदायिक वनमा कृष्णसार राख्नका लागि पूर्वाधार सम्पन्न गर्ने नीति तथा कार्यक्रम प्रस्तुत गरे ।

यस्तै, सौराहालाई सौन्दर्यीकरण गर्न फुटपाथसहितको साइकल लेन निर्माण गरी सडकबत्ती जडान गर्ने, हरियाली पार्कलाई बहुउद्देश्यीय अवधारणाबाट सञ्चालन गरी पर्यटन प्रवर्द्धन गर्ने, लौरीघोल र पञ्चनदीलाई व्यवस्थित गर्न पदमार्ग निर्माण गरी संरक्षण गर्ने, एक घर एक धाराको नीति अवलम्बन गरिने नीति तथा कार्यक्रममा समेटिएको छ ।

यसैगरी, सामाजिक तथा सांस्कृतिक रुपमा पछाडि परेका नगरवासीलाई उद्यमशीलता प्रवद्र्धन गर्ने, नगरप्रमुख उद्यमशील कार्यक्रमलाई निरन्तरता दिने, उद्योग संघ चितवनसँगको सहकार्यमा उद्यमी सिर्जना गर्ने, नगर सूचना प्रविधिमैत्री, सेवाप्रवाहलाई सरलीकृत, गुणस्तरीयर रोजगारमूलक शिक्षाको विकास गर्दै व्यवसायिक र सीपमूलक कार्यक्रमलाई थप विस्तार, गरिब तथा विपन्नलाई निःशुल्क स्वास्थ्य उपचारको व्यवस्था गर्दै स्वास्थ्य बिमा कार्यक्रमलाई थप विस्तार गरिने नीति तथा कार्यक्रममा उल्लेख छ ।

यसैगरी नगरप्रमुख सापकोटाले रत्ननगर नगरपालिकाको विषयगत शाखाहरु आर्थिक विकास, सामाजिक विकास, पूर्वाधार विकास, वन, वातावरण तथा विपद् व्यवस्थापन र सुशासन तथा संस्थागत विकासको छुट्टाछुट्टै नीति तथा कार्यक्रम प्रस्तुत गरे । उनले शिक्षा, स्वास्थ्य, कृषि तथा पशुपालन, पर्यटन विकास, सामाजिक सुरक्षा, भौतिक पूर्वाधार तथा विकास, बालबालिका, युवा तथा खेलकुद, सुशासनको प्रत्याभूति, स्थानीय कला, संस्कृति, साहित्य र भाषाको प्रवर्द्धन, सूचना सञ्चार तथा प्रविधिसम्बन्धी नीति, अनुसन्धान, उद्योग व्यवसायसम्बन्धी नीति र वातावरण तथा विपद् व्यवस्थापन नीतिहरु आगामी वर्षको कार्यक्रममा समेटिएका छन् ।

नगरसभामा रत्ननगर नगरपालिकाका उपप्रमुख यादवप्रसाद पाठकले १ अर्ब ३३ करोड ७२ लाख ७३ हजारको अनुमानित बजेट प्रस्तुत गरेका छन् । उपप्रमुख पाठकले प्रस्तुत गरेको बजेटमा आगामी आर्थिक वर्षमा आर्थिक विकासतर्फ रु २ करोड ५ लाख ६५ हजार, सामाजिक विकासतर्फ रु २ करोड ५७ लाख ६ हजार, पूर्वाधार विकासतर्फ रु ३ करोड ८ लाख ४८ हजार, वन वातावरण तथा विपद् व्यवस्थापनतर्फ रु ८२ लाख २६ हजार, सुशासन तथा संस्थागत विकासतर्फ रु ५१ लाख ४१ हजार खर्च हुने अनुमान गरिएको छ ।

यस्तै, नगर गौरवका आयोजनातर्फ रत्ननगर हरियाली पार्क रु ३ करोड २० लाख, सार्वजनिक जग्गा संरक्षण तथा घेराबार कार्यक्रमका लागि २० लाख, उज्यालो रत्ननगर अभियानका लागि १ करोड ५० लाख, नगरप्रमुखसँग उद्यमशील कार्यक्रम १ करोड, रत्ननगर १० मा फुटबल खेलमैदान निर्माण १ करोड, विपन्नका लागि ५० प्रतिशत छूटमा स्वास्थ्य बिमा ७५ लाख, कृष्णसार वासस्थान व्यवस्थापन ५० लाख, लौरीघोल र पञ्चनदी संरक्षण तथा पार्क निर्माण ५० लाख रकम विनियोजन गरिएको छ ।

अन्य निकायका योजना सडकबोर्डतर्फ रु ८० लाख, सामाजिक सुरक्षातर्फ ३० करोड, प्रदेश पूर्वाधार विकास साझेदारीतर्फ रु ९ करोड २७ लाख ६१ हजार, वित्तीय समानीकरण अनुदान १ करोड ९६ लाख ६३ हजार, सशर्त अनुदान ३ करोड ३० लाख ९८ हजार, समपूरक अनुदान ३ करोड, विशेष अनुदान १ करोड, जनसहभागिता १ करोड ५० लाख, श्रम तथा वस्तुगत सहायता १ करोड ५० लाख बजेट अनुमान गरिएको छ ।

उपप्रमुख पाठकका अनुसार आगामी आर्थिक वर्षको अनुमान गरिएको खर्च बेहोर्ने स्रोतमध्ये संघीय सरकार अन्तर सरकारी वित्तीय हस्तान्तरणतर्फ रु ९७ करोड २१ लाख ६१ हजार र राजस्व ३५ करोड १ लाख १२ हजार, राजस्व बाँडफाँट रु २० करोड ८१ लाख १२ हजार, आन्तरिक आय रु १२ करोड हुने बजेटमा अनुमान गरिएको छ ।

नगररपालिकाको १६ वटै वडाको लागि बजेटमा व्यवस्था गरिएको छ । जसअन्तर्गत वडा नं १ का लागि रु ९० लाख ९३ हजार, वडा नं २ का लागि ८९ लाख ४७ हजार, वडा नं ३ तर्फ रु ८६ लाख ९५ हजार, वडा नं ४ का लागि रु ८६ लाख ४२ हजार, वडा नं ५ का लागि रु ८६ लाख ६४ हजार, वडा नं ६ का लागि ९५ लाख ५ हजार, वडा नं ७ का लागि रु ८७ लाख ६५ हजार, वडा नं ८ का लागि रु ८६ लाख ८३ हजार, वडा नं ९ का लागि रु ८९ लाख ९८ हजार, वडा नं १० का लागि ९१ लाख २५ हजार, वडा नं ११ का लागि ९७ लाख ५८ हजार, वडा नं १२ का लागि रु ८९ लाख ९९ हजार, वडा नं १३ का लागि ९३ लाख ३३ हजार, वडा नं १४ का लागि ९२ लाख ५४ हजार, वडा नं १५ को लागि रु ८७ लाख ६७ हजार र वडा नं १६ को लागि रु ८७ लाख ६५ हजार बजेट विनियोजन गरिएको छ ।

रत्ननगर नगरपालिकाका प्रमुख प्रशासकीय अधिकृत छविवाल सुवेदीले स्वागत मन्तव्य राखेको कार्यक्रममा वडाध्यक्षहरु, नगरकार्यपालिका सदस्य तथा विभिन्न विषयगत शाखाका कर्मचारीहरुको सहभागिता रहेको थियो ।

रत्ननगर नगरपालिकाले निर्वाचित जनप्रतिनिधि पदबहाली भएको एक वर्ष पूरा भएको अवसरमा शनिबार पत्रकार सम्मेलन गरी कार्यप्रगति प्रस्तुत गरेको छ । रत्ननगर नगरपालिकाले चालु आव २०७९/०८० मा एक अर्ब ८६ करोड ३३ लाख ७० हजार ७१० बजेट विनियोजन गरेकोमा वैशाख मसान्तसम्ममा ७० करोड ८८ लाख ५७ हजार ७३० रुपैयाँ अर्थात् ४२.१ प्रतिशत खर्च भएको नगरप्रमुख प्रल्हाद सापकोटाले जानकारी दिए । उनले आफू जनप्रतिनिधिमा पदबहाली भइसकेपछि चुनावमा प्रतिबद्धता गरेका धेरै विषय कार्यान्वयनको चरणमा रहेको बताएका छन् ।  नगरप्रमुख सापकोटाले आफ्नो कार्यकालमा सम्पन्न भएका २६ बुँदे कार्यप्रगति विवरण सार्वजनिक गरेका छन् । जसअन्तर्गत रत्ननगरका तीन हजार विपन्न परिवारलाई स्वास्थ्य बिमा उपलब्ध गराउनुका साथै स्वास्थ्य बिमाबाट वञ्चित विपन्नलाई उपचारका लागि बकुलहर रत्ननगर अस्पतालमा विपन्न नागरिक उपचार कोष व्यवस्थापन गरिएको र सोही अस्पताल परिसरमा मातृशिशु भवन निर्माणाधीन रहेको उनले जानकारी दिए । रत्ननगरलाई उज्यालो रत्ननगर बनाउने लक्ष्यअनुरुप निपनी, बकुलहर, सौराहाचोक र टाँडीचोकमा मास लाइटको व्यवस्था गरिएको उनले जानकारी दिए । फोहोर व्यवस्थापनमा नेपालकै उत्कृष्ट नगर हुन सफल भई ‘बिल एण्ड मेलिन्डा गेट्स फाउन्डेसन’बाट पाँच हजार डलर पुरस्कार पाउन सफल भएको खुसी पनि उनले सो अवसरमा साँटे ।  बजार क्षेत्रमा पार्किङ व्यवस्थापन, विद्युत्को पोलहरुबाट अनावश्यक तार हटाउने र मापदण्डविपरीत सडक मिचेर बनाइएका अनाधिकृत संरचनाहरु हटाई व्यवस्थित र सुन्दर नगर निर्माणको प्रक्रिया थालनी गरिएको नगरप्रमुख सापकोटाले बताए । नगरपालिकामा भू–उपयोग तथा घरजग्गा वर्गीकरण अन्तिम चरणमा पुगेको, वाङ्मय परिषद् स्थापना गरी सञ्चालनमा ल्याइएको, नगर मेलमिलाप केन्द्र पुनर्गठन गरिएको र धेरै समयदेखि तामेलीमा रहेका मुद्दाहरुको समस्या समाधान गरी सुशासन कायम गरिएको उनले बताए । विकास निर्माणका योजनाअन्तर्गत सौराहाको राप्तीकिनारमा ७ करोड ५० लाख रुपैयाँको लागतमा ड्याक निर्माण कार्य सम्पन्न भएको, नगरपालिकाको मागबमोजिम संघीय सहरी विकास मन्त्रालयमार्फत १४ करोड २४ लाखको लगानीमा सौराहा राप्ती ड्याकदेखि हर्नरीपुलसम्म साइकल लेन र फुटपाथसहितको १५ मिटर चौडाइको सडक निर्माण भइरहेको, २ करोड ३५ लाख रुपैयाँमा ठेक्का सम्झौता भई हस्पिटलरोडमा फुटपाथसहितको सडक नाला निर्माण सुरू गरिएको र २९ करोड रुपैयाँको लगानीमा कयरखोला तटबन्ध निर्माण कार्य अन्तिम चरणमा पुगेको उनले जानकारी दिए । यस्तै, झुवानी बस्तीको सुरक्षाका लागि ढुङ्ग्रेखोलामा ८०० मिटर तटबन्ध निर्माणको काम अन्तिम चरणमा पुगेको, चित्रसारीपुलदेखि सौराहाड्याकसम्म फुटपाथ तथा साइकल लेनसहितको सडक निर्माण गरिएको उनले जानकारी दिए । उनले खगेरीखोलामा मिनीक्रुजसहितको हरियालीपार्क निर्माण गरिने, पञ्चकन्या सामुदायिक वनअन्तर्गत रहेको १७ हेक्टर जमिनमा तारजालीसहित बर्दिया राष्ट्रिय निकुञ्जबाट १९ वटा कृष्णसार ल्याइने, खगेरीपुलको आडमा फुटबल तथा क्रिकेटको ग्राउन्ड निर्माण गरिने र रत्ननगर–१२ स्थित वागदेवी इन्जिनियरिङ कलेज स्थापनाको प्रक्रियामा रहेको जानकारी दिए ।यसैगरी, शैक्षिक गुणस्तर कायम राख्न कक्षा ८ को परीक्षा सञ्चालन गरी नतिजा कोडिङ र डिकोडिङमार्फत प्रकाशन गरिएको, प्राविधिक शिक्षामा १० जना विद्यार्थीलाई ५० प्रतिशत छात्रवृत्ति, विपन्न परिवारका १९ जनालाई उच्चशिक्षामा छात्रवृत्ति र निजी विद्यालयमा दलित, अल्पसंख्यक र जेहेन्दार विद्यार्थीलाई १० प्रतिशत छात्रवृत्तिको व्यवस्था गर्न लागिएको नगरप्रमुख सापकोटाले पत्रकार सम्मेलनमा बताए ।
कार्यक्रममा रत्ननगरका विभिन्न शाखामार्फत भएका कार्यप्रगति विवरण प्रस्तुत गरिएको थियो ।कार्यक्रममा उपप्रमुख यादवप्रसाद पाठक, प्रमुख प्रशासकीय अधिकृत छविलाल सुवेदी, नगरशिक्षा अधिकारी बद्रिनारायण शर्मा, विज्ञ सल्लाहकार रामहरि न्यौपाने, नगरप्रवक्ता कुलप्रसाद सापकोटालगायत राजनीतिक दलका नेता, वडाध्यक्ष, कर्मचारी एवं कार्यपालिका सदस्यहरुको सहभागिता रहेको थियो ।